(20) මගේ පළමු හාදුව || My first kiss

**********(තිසර රාජිත සේනාපති කියන කතාව)**********

.

පෙම්වත, මම ඔබට බොහෝ පෙම් කරමි.
දිවුරමි මම ඒ ගැන, ඔබ රිසියෙහි නම්,
දිවුරමි මම, දෙවියන්ගේ නාමයෙන්.

හැම මොහොතක්ම මා ඔබට ඇති ආදරයෙන් පිරී ඇත්තේය.
එවන් දැඩි ආශාවක් පවතින්නේ කෙසේදැයි
පෙම්වත, ඔබ මා හමුවුවහොත්
මම ඔබට කියාදෙමි.

මගේ කවිය ඔබ ගැන මැවූ අපූරු සිහිනයකි.
ඔබෙන් තොර දිවියක් මට නැත්තේය
මට හුස්ම වැටෙන්නේ කවදා තෙක්ද
එතෙක් මම ඔබට ආදරය කරමි.

සයුරෙහි රළ ඇත්තේ යම් පමණෙකටද
එපමණටම මම ඔබට ආදරය කරමි.
එබැවින් මේ මනදොළ
කිසිදිනෙක තුනී නොවන්නේය.

පෙම්වත, මම ඔබට බොහෝ පෙම් කරමි.
දිවුරමි මම ඒ ගැන, ඔබ රිසියෙහි නම්,
දිවුරමි මම, දෙවියන්ගේ නාමයෙන්.

.

හැම මිනිසකුම පළමු වරට මවගෙන්ද, දෙවන වර තවත් ගැහැණියකගෙන්ද උපත ලබන්නේය කතාවක් තිබේ.

මමද එලෙස වෙනත් ගැහැණියකගෙන් ද්වෝත්පත්තිය ලද්දෙක්මි. ඒ අසිරිමත් ගැහැණිය මාධුරී දික්සිත්ය.

“දිල් තෝ පාගල් හේ – දිල් දිවානා හේ…”

‘දිල් තෝ පාගල් හේ’ මා  අනිමිසලෝචනය කළ පළමු හින්දි සිතුවම්පටයයි. ඉංග්ලිෂ් ෆිල්ම් එකකට හෝ ඉතා කලාතුරෙකින් සිංහල ෆිල්ම් එකකට හැරුණු විට තාත්තා අප හින්දි ෆිල්ම්ස් බලන්ට කැටුව නොගියේය. මගේ වැඩිමහළු සොහොයුරියන්ටද හින්දි උන්මාදයක් නොවීය. “කුච් කුච් හෝතා හේ” වැනි රණවිරු අයියා කෙනකුට, ගාමන්ට් අක්කා කෙනෙකුට වුව වැටහෙන සරල හින්දි කෑල්ලක් වත් ඔවුහු නොදත්තෝය.  මෙනිසා මා පළමු හින්දි සිතුවම්පටය දුටුවේ නව යොවුන් වියෙහි එළිපත්තේදීය. මගේ පරිගණක තිරයෙනි. DVD එක ඉල්ලා ගත්තේ මිතුරකුගෙනි. සොසේජ් බන් එකක හා ප්ලේන්ටියක හිලව්වටය.

පුංචි තිරයේ නටන මේ අපූරු යුවතියට මම එකෙණෙහිම වශී වූයෙමි. ඇගේ, ඇස්, නැහැය, සිහින් සිරුර, ආඩම්බරකාර පෙනුම මා උදෙසාම දෙවියන් විසින් මවන ලද්දාක් වැන්න. මට හැඟුණේ ඇය මා ජීවිතකාලය පුරාවට දත් කෙනකු සේය. මගේ මොළයෙහි නියුරෝන සියල්ල එකවර පණ ආවාක් සේ විදිලි සර නිකුත් කරන්ට පටන් ගත්තේය. කිසිම වෙහෙසක් නොදරාම ‘දිල් තෝ පාගල් හේ’ ගීතය මට පාඩම් විය. ඉන්ටර්නෙට්හි එක සැරයක් දැක කියැවූවාට පසු එහි අර්ථය මට මතක හිටියේය.

ඉනික්බිති  එකකට පසු එකක් මම ඇය රඟපෑ සිතුවම්පට නරඹන්ට පටන් ගතිමි. එසේ වෙතත්, මට DVD ගන්ට අම්මා සල්ලි නුදුන් නිසාත්, තැටියක් ඉල්ලා ගන්ට හෝ හින්දි ෆිල්ම් පිස්සන් මගේ මිතුරන් අතර සුලබ නොවූ නිසාත් මට ඉදිරියට යන්ට හැකි වූයේ සෙමෙනි.

මගේ දෙවන ‘මාධුරී’ අත්දැකීම ‘සාජන්‘ය. ‘දිල් තෝ පාගල් හේ’ ට වඩා වසර හයක් පැරැණි එය ත්‍රිකෝණ ප්‍රේම වෘත්තාන්තයකි.

අමාන් (සන්ජේ දත්) ආබධිත අනාථ දරුවෙකි. ඔහු සම වයසේ වූ ආකාෂ් (සල්මන් ඛාන්) ට මුණ ගැසෙයි. ටිපිකල් හින්දි ෆිල්ම් එකක වන්නාක් සේම ආකාෂ් ගේ දෙමාපියෝ අමාන් හදා වඩා ගන්ට කැමැති වෙති. මේ දෙදෙනාම සොහොයුරන් සේ වැඩෙති. අමාන් ‘සාගර්’ යන නමින් කවි ලියන්ට පටන් ගන්නා අතර නොබෝ කාලයකින්ම ටිපිකල් හින්දි ෆිල්ම් එකක වන්නාක් සේම අතිශය ජනප්‍රියතාවයක් දිනා ගන්ට සමත් වෙයි. පූජා (මාධුරී) ඔහුගේ රසිකාවියකි. ඇය කවියා හා ලියුම් ගණුදෙනු කරන මුත් ඔහු මුහුණට මුහුණ හමුවී නොමැත. මේ අතර ටිපිකල් හින්දි ෆිල්ම් එකක වන්නාක් සේම ආකාෂ්ට පූජා වෙසෙන ගම්මානයටම ව්‍යාපාරික කටයුත්තකට යන්ට සිදුවේ. අමාන් හා පූජා අතර වූ අතත්‍ය සම්බන්ධතාවය දන්නා ආකාෂ් ‘සාගර්’ නම් කවියා තමන්ය පූජා රවටයි. අමාන් ඇයට පෙම් කළද මිත්‍රත්වය හා තමන්ගේ ආබාධිත තත්ත්වය හමුවෙහි ඇය ආකාෂ් හා එක් වන්නේ නම් යහපත්ය කල්පනා කරයි. අවසානයේ ටිපිකල් හින්දි ෆිල්ම් එකක වන්නාක් සේම මේ ගැටළුවට හැමට පිළිගන්ට පුළුවන් විසඳුමක් ලැබී පූජා අමාන් හා එක්වෙයි. සිතුවම්පටය අවසාන වෙද්දී මගේ නෙත් තෙත්ව තිබුණේය.

මේ බොළඳ අතාත්වික ආදර අන්දරයට මා එතෙක් බැඳුනේ මන්ද?

‘සාජන්’ හි ප්‍රධාන චරිතය මාධුරී රඟ නොපෑවේ නම් මා ඊට ආකර්ෂණය වනු ඇත්දැයි මම මගෙන්ම අසා ගනිමි. ඊට පිළිතුරක් නැත. මාධුරීගෙන් තොර ‘සාජන්’ සිතුවම්පටයක් නිර්මාණයව නොතිබුණු බැවිනි. එනිසා මට සන්සන්දනය කර බලන්ට දෙයක් නැතිය.

මම සාජන් හි ‘බහුත් ප්‍යාර් කර්ති හේන්..’, ‘ජියේ තෝ ජියේ කයිසේ…’ හා ‘මෙරා දිල්භි කිතනා පාගල් හේ…‘ ගීත තරමටම ඊළඟට හමු වූ ‘පාරින්දා‘හි ‘තුම් සේ මිල්කේ‘ ටත් ආදරය කළෙමි. හින්දි අර්ථය පිළිබඳව අන්දෝ සංසාරයක දැනුමක් නැතිව ඒවා පොත් වල ලියා තැබුවෙමි. දිනෙකට සිය සැරයක් ඉඩ ලැබුණු විටෙක මිමුණුවෙමි. ඒ රහසිනි. මා කොටසක් වූ සමාජය හින්දි සිතුවම්පට ගැන ප්‍රශංසා මුඛයෙකින් කතා කළ එකක් නොවීය. ඔවුන් අතර නුසුදුස්සකු වන්ට ඕනෑකමක් නොවූ හෙයින් මම ලේබල් ගසා නොගන්ට පරෙස්සම් වීමි.

‘බහුත් ප්‍යාර් කර්ති හේන්..’ ගැයුවේ අනුරාධා පෞද්වාල් ය. ‘තුම් සේ මිල්කේ’ හි ගායිකාව ආශා බෝස්ලේ ය. මේ දෙදෙනාගේම හඬ මාධුරීට අපූරුවට ගැළපුණේය.

මට මාධුරී කෙරෙහි වූයේ රසිකයකුට ශිල්පිනියක කෙරෙහි දැක්විය හැකි උතුම් ප්ලැටොනික වීතරාගී ආදරයකි. මිතුරකු ඇගේ නිරුවත් පින්තූර රැසක් ඉන්ටර්නෙට් හි ඇතැයි කී නිසා දිනෙක මම නිකමට ‘Madhuri Dixit Nude Photos’ කියා ගූගල් කළෙමි. මා දුටු සියල්ල ෆොටෝ දක්ෂ ග්‍රැෆික් එඩිටර්ලාගේ නිර්මාණ බවට සැකයක් නැත. නැතිනම් පින්තූරයෙන් පින්තූරයට මාධුරීගේ ඇනටොමි එක වෙනස් වන්ට බැරිය. (එක පින්තූරයක ඇගේ පියයුරු දොඩම් ගෙඩි තරම් වූ අතර තවෙකක ඒවා ජම්බෝල තරම් විය!) මේ කිසිවකට මම නොකැමැති වීම්. ඉන්පසු කෙදිනක හෝ මම ඇගේ නිරුවත් ඡායාරූප නොසෙවීමි. වරක් හෝ එසේ කිරීම ගැනද මට ඇතිවූයේ වරදකාරී හැඟීමකි. මා ගැනම පිළිකුළෙකි. මා එසේ නොකළා නම් හොඳය මට අදත් සිතෙයි.

මාධුරීට වශී වූ එකම පිරිමියා මා නොවීම ගැන නම් මට වූයේ සතුටකි. ඇගේ රසිකයින් අතර මට වඩා බොහෝ ඉහළින් සිටියෝ වූහ. එවැන්නකු නම් ‘භාරතයේ පිකාසෝ’ ලෙස Forbes සඟරාව වරක නම් කරන ලද. එරට ප්‍රකටතම චිත්‍ර ශිල්පියකු වූ එම්. එෆ්. හුසේන්ය. ජීවිතයේ නව වැනි දශකය ගෙවමින් හුන් හුසේන් මාධුරී රඟපෑ ‘හම් ආප්කේ හේන් කෞන්” හැට හත් (67) වතාවක් නැරැඹීය. ඇය සිය තෙලි තුඩට වාර ගණනාවක්ම මාතෘකා කොට ගත්තේය. භාරත මාධ්‍ය හුසේන්ට ‘නාකි මනමාළයා’ය නොකියා කීහ. නමුදු ඔහු තුළ මාධුරී කෙරෙහි වූයේ මා තුළ වූවාක් සේම ප්ලැටොනික වීතරාගී ආදරයක් බවය මා සිතූයේ.

මා මාධුරී දික්සිත් ගැන මෙතෙක් කියන්නේ මන්ද?

ජීවිතය ගලා යන්නේ අපට ඕනෑ විදියට නොවේ. සමහර විට එය අප කිසිසේත් නොසිතන ආකාරයේ වංගු ගනියි. මාධුරී නිසා මා ජීවිතයේ නොසිතූ විරූ වංගුවක් ගෙන ඇති බව මා අවබෝධකොට ගත්තේ බොහෝ කාලයකට පසුවය.

චරී මාධුරීගේ රසිකයකු බව මම දැන නොසිටියෙමි. අඩු තරමින් ඔහු හින්දි ෆිල්ම්ස් බලන බවක් වත් මම අසා නොතිබුණෙමි. නමුත් මා ඔහුගෙන් ඉල්ලාගත් එරික් සෙගාල්ගේ  Love Story ඇතුළේ මාධුරීගේ ටිකක් පරණ වූ කළු සුදු ඡායාරූපයක් තිබුණේය. මුහුණ පොඩියක් විතර මා දැන සිටි මාධුරීට වෙනස්ය. සමහර විට ඇය සිතුවම්පටයකට වෙස් ගන්වා ඇති අවස්ථාවෙක ගත් එකක් වන්ට ඉඩ තියේ. එසේම සැබෑ ජීවිතයේදී නළු නිළියන් තිරයෙහි දකිනවාට වඩා වෙනස්ය. මට තවත් ගැටළුවක් වූයේ ඡායාරූපය පසුපස ස්ටූඩියෝ එකක නමක් හා යම් අංකයක් ලියා තිබීමයි. ඒ ගැන දුරට කල්පනා කරන්ට මට එවෙලෙහි නොසිතුණේය.

“I didn’t know you were a fan of Madhuri…” පසු දිනෙක මම පොත රිටර්න් කරද්දී කීවෙමි.

“Who..?” චරී විපිළසර විය.

“Madhuri…Madhuri Dixit. Don’t tell you don’t know her”

“Who is she? Why should I know her?”

“There was a photo of her in your book.”

“In my book…?”

මම පොත තුළින් ඡායාරූපය ඇද ඔහුට දුනිමි. ඔහු ටික වෙලාවක් එදෙස බලා සිටියේය.

“This was my mother…” චරී කීවේය. “…actually, this book was hers.”

අවුරුදු ගණනාවක ගැටළුවකට විසඳුම තත්පරයකින් දහයෙන් පංගුවකදී මට ලැබුණේය.

ඒ කළු දීප්තිමත් ඇස්! ඒ දිගටි නැහැය! ඒ සිහින් සිරුර!

‘දිල් තෝ පාගල්’ දුටු දිනයෙහිම මාධුරී බොහෝ කාලයක් තිස්සේ දැන සිටි කෙනකු යැයි මට හැඟුණේ මන්ද? මම දැන් ඊට පිළිතුර දනිමි.

දයාබර පාඨකය, ඉදින් මගේ කතාව නවකතාවක් වී නම් මාධුරී මගේ ජීවිතයට සම්බන්ධ වීම මේ සිද්ධියට අනුගාමීව චරීද මා සේම ඇගේ ඩිවෝටඩ් ෆෑන් කෙනකු වීමෙන් පමණක් නිමාවන්ට තිබුණේය. නවකතාකරුවෝ අතිශය කලාතුරෙකින් හැරුණු විට සංකීර්ණත්වයට නොරිසි වෙති.  එහෙත් ජීවිතය නවකතාවකට වෙනස්ය. අතිශය සංකීර්ණය. ජීවිතයෙහි වන්නේ නවකතාවෙක ඇතුළු කරන්ට ලේඛකයකු සිහිනෙකින්වත් නොසිතන දේය.

අප දෙදෙනාම මාධුරී සමඟ තවත් කාලයක් ඉදිරියට ගමන් කළ යුතුය කොතැනක හෝ ලියැවී තිබුණාක් වැන්න. මින් වසර කිහිපයකට පසු ඇය නැවත අපේ ජීවිත වලට ඇතුළු වූවාය. චරීගේ පැත්තෙන් ගතොත් ඒ ගෲෂාට පසුව දිනූෂාට කලිනි. අප දෙදෙනා අධ්‍යයන පොදු සහතික පත්‍ර (සාමාන්‍ය පෙළ) විභාගය අවසන් කළ වහාම වාගේය.

මේ කතාව නවකතාකරුවකු අතින් ලියැවුණේ නම් ඔහු කොයි තරම් පිස්සකු වුණත් මාධුරී ලංකාවට කැඳවාගෙන එනු ඇතැයි ඔබ සිතන්නේද? එහෙත් සැබෑ ජීවිතයේදී මාධුරී ලංකාවට ආවාය. වඩා නිවැරදි වුවහොත් සිරස මාධ්‍ය ජාලය විසින් කැඳවාගෙන එනු ලැබුවාය. එපමණක් නොව චරීටද මටද ඇය හමුව කතා කරන්ටද ලැබුණේය.

දැන් නම් මෙය සහතිකවම මගේ සිහිනයකැයි ඔබ කියනු ඇත්තේය. නැත. එසේ වූයේ සිරස නිසාය.

Akon ලංකාවට ගෙනෙන්ට ගොස් හොම්බ බිම ඇණ ගත්තායින් පසුව සිරස ඊට වඩා ‘දේශප්‍රේමයට කිට්ටු’ මෙහෙයුමක් සැලසුම් කළේය. මාධුරී මෙහි ආවේ ඒ අනුවය.

සිරස මාධ්‍ය ජාලය මාධුරී ලංකාවට පැමිණෙන්ට මාස දෙකකට කලින් තරගයක් හඳුන්නා දුන්නේය. ඒ ඇය වෙනුවෙන් ෆේක්බුක් පිටුවක් තනා වැඩිම මිතුරන් පිරිසක් ඇති කර ගන්නා රසික රසිකාවියන් දස දෙනකුට ඇය සමඟ රාත්‍රී භෝජන සංග්‍රහයකට සහභාගි වීමේ අවස්ථාව ලබා දෙන්ටය. චරී හා මා ඇය හමුවූයේ කෙසේ දැයි දැන් ඔබට සිතා ගත හැකි වන්නේය. චරී මේ තරගයේ තුන් වැන්නාය. ඔහුගේ පිටුවට මිතුරන් 18,000 කට අධික පිරිසක් විය. මිතුරන් 16,000 කට  ආසන්න සංඛ්‍යාවක් සමඟ මම සත්වැනි තැනට පත්ව සිටියෙමි.

සිරස මාධ්‍ය ජාලය පොරොන්දුවෙහි අඩක් ඉටු කළ මුත් ඉතිරි අඩ ඉටු නොකළාය. අපට ඇය සමඟ භෝජන සංග්‍රහයකට සහභාගි වන්ට නොලැබුණේය. ඒ වෙනුවට අප දස දෙනාට අවස්ථාව ලැබුණේ ඇය සමඟ මිනිත්තු පහක් ගත කරන්ටය. අනෙකුන් ගැන මම නොදනිමි. මම නම් ඉන් පූර්ණව තෘප්තිමත්ව සිටියෙමි. මා දෙවන වර ලොවට බිහිකළ මේ ගැහැණිය මුහුණට මුහුණ හමුවීම මට ඒ වනතෙක්ම සිහිනයක් පමණක් විය. ඉන් පෙර රාත්‍රිය මා නිදිවර්ජිතව ගෙවූයේ කවර හෝ හේතුවක් නිසා ඇය තම ලංකා ගමන කල් තබාවිය බියෙනි.

අපි ටජ් සමුද්‍රා හෝටලයේ ලොබියේදී ඇය හමුවීමු. ඒ නිල උත්සවයෙන් පසුය. නිල උත්සවයටද ආරාධනා ලැබුණු මුත් අනවශ්‍ය ප්‍රචාරය අපට ගැටළුවක් වූයේ මේ තරගයට අප සහභාගි වූ බව දෙමාපියන්වත් විද්‍යාලය වත් දැන නොසිටි හෙයිනි. මා ගෙදරට කියා ආයේ චරීලාගේ ගෙදර යන බවය. එය පාර්ශ්විකව ඇත්තකි. දෙල්කඳ සිට ටාජ් සමුද්‍රා එකට ආවේ චරිගේ අප්පච්චිගේ වාහනයෙන් නිසාය.

තමන්ගේ සිහින වීරවරිය පියවි ලෝකයේ මුණ ගැසීම කෙනකුට කොයිතරම් වැදගත් සිදුවීමක් විය හැක්කේද? එවන් අවස්ථාවක කෙනෙකුට අසන්ට ප්‍රශ්නයකුත් ඇද්ද? මාධුරීගෙන් අසන්ට ප්‍රශ්න දහසක් මට තිබුණද ඇය හමුවේ මම ගොලුවීමි.

මා වෙනුවෙන්ද කථා කළේ චරීය. සාමාන්‍යයෙන් නිහඬ චරිතයක් වූ ඔහු මේ අවස්ථාවේදී නම් අප සියළු දෙනා වෙනුවෙන්ම කතා කළේය. එය වැදගත් වූයේ අනෙක් අට දෙනාගෙන් වැඩි පිරිසකට Yes madam, No madam, You are very very beautiful madam, You like Sri Lanka madam, no? Do you like Sri Lanka cricket madam?, Who is the best Sri Lanka cricketer madam?, Do you like Sanath Jayasuriya madam?, What is your best film madam?, My grandmother too very much like you madam වලින් එපිට ඉංගිරිසියක් බැරි වූ හෙයිනි.

සිරස අයියලාද මේ විනාඩි පහ කැමරා කිහිපයකින්ම වීඩියෝ කළහ. එය වළක්වන්ට බැරිය. එය ඔවුන්ගේ ජොබ් එකය. මම හැකිතාක් කැමරාවට වෙට්ටු දමමින් සිටියෙමි. මේවා රූපවාහිනියේ පෙන්නුවාම උත්තර බඳින්ට වෙන එක ගැන සිතමිනි. චරීට නම් එය ලොකු ගැටළුවක් නොවෙන්ට ඇත. ඔහුගේ අප්පච්චි ඔහු උන්නාද මළාද නොසොයයි. චරී කවදාවත් ඒ නිදහස අයුතු ලෙස භාවිතා නොකළ බවත් ලිවිය යුතුය. මේ විශේෂ අවස්ථාවකි. අනෙක ටජ් සමුද්‍රා එකට විවෘතව ප්‍රකට ඉන්දියානු නිළියක මුණ ගැසෙන්ට යනවා කියන්නේ කෙල්ලක් එක්ක ගෝල්ෆේස් යනවාට නොවේ.

මාධුරී සිටියේ සැහැල්ලුවෙනි. මේ ඇගේ දින චරියාවෙහි එක් අංගයක් විය යුතුය. ඇය අප සියළුදෙනාගෙන්ම එක ප්‍රශ්නයක් හෝ අසන්ට උත්සුක වූවාය.

“So do you also love Devdas?”

මට සිහි එළවා ගන්ට ටික වෙලාවක් ගතවිය. කවුරුන් හෝ මගේ අතින් ඇද්දේය සිතමි.

“Of course! Chandramukhi’s role was perhaps the best in your career. It impressed me so much that I even read Chattopadhyay’s novel

“අචා. That’s good. බුක් පධා නහි හුම්…මත්ලබ්, ..I have not read the book”

මමද චට්ඨෝපාධ්‍යගේ ‘දේවදාසි’ නවකථාව කියවා නැත්තෙමි. මා දැන සිටියේද ඒ ගැන ඉන්ටර්නෙට් වලින් සොයා ගත් කාරණා කිහිපයක් පමණෙකි. එහෙත් තමන්ගේ වීරවරිය අභියස ලකුණු ටිකක් දමා ගන්ට අකැමැති කෙනෙකුත් වේද?

“It’s a great book. You should give a try…”

“Yes, I should definitely. Thanks…Now, what do you think about ‘Hum Aapke Hain Koun..’? You liked it?”  ඇය මට වම් පසින් සිටි පැල්මඩුල්ලෙන් ආවාය කියූ ගැහැණු ළමයා දෙසට හැරුණාය.

“Yes madam. Thank you madam. You are very beautiful madam…”

මේ මෙම ගැහැණු ළමයා ඕනෑම ප්‍රශ්නයකට දෙන්ට කට පාඩම් කර ගෙන ආ පිළිතුරය සිතමි.

මාධුරී ඉක්මණින් අපේ සමුගත්තේ “Sorry, I have to go. Minister is waiting for me, but I love to meet you all again.” කියමිනි. මේ නොවන්නක් බව මම දනිමි. මම ඒ ගැන කම්පා නොවෙමි. ඇය මා වෙනුවෙන් මිනිත්තුවක් හෝ වැය කිරීම මට වටනේය.

සමුගෙන යන්ට කලියෙන් මාධුරී අප සියළු දෙනාටම cheek kiss එක බැගින් දුන්නාය. ඇය චරීගේ මුහුණට සිය මුහුණ ළං කරද්දී මා දුටුවේ ඔවුන් දෙදෙනා අතර කෙළින් බලන විට මඳක් සැඟවෙන, එහෙත් පැත්තෙන් බලන විට අපූරුවට ඉස්මතු වන සමානතාවයයි.

කා-පාක් එකට ඇවිද යන තුරුද චරීගේ සුදු මුහුණ රතු වී තිබෙණු මම නිරීක්ෂණය කළෙමි.

“You know something Thisu…” ඔහු මට කොඳුරයි.

“Tell me…”

“That was the first kiss I had in my life…”

එය මගේ ජීවිතයේද පළමු හාදුව බව මා ඔහුට කිව යුතුද?

.

.

(ඉවසන්න…………………සමනළයා යළි පියා සලන තෙක්)

Advertisements
Leave a comment

17 Comments

  1. kathandarakaraya

     /  September 10, 2012

    Silly!

    Reply
  2. Anonymous

     /  September 10, 2012

    අද මේක ලිව්වෙ කකාද?

    Reply
    • kathandarakaraya

       /  September 10, 2012

      සමනල විප්ලවය ලේඛකයාට අපහාස නොකරණු!

      Reply
  3. Chathura

     /  September 10, 2012

    තවත් සමාන්තර විෂ්වයක, චරියගෙ ඉස්කෝලෙ ඉන්ග්‍රීසි ගුරුවරයෙකුත් හිටියා තිසරගේ වාසගමම් තියන. පොර ඉන්ග්‍රීසි ඇරෙන්න අනිත් හැමදේම ඉගැන්නුවා.

    අද කතාව පොඩ්ඩක් චා..අඩුගානෙ ශාසනයාට වත් කිස් එකක් දෙන්න තිබ්බා ධර්මසිරි ලොක්කට අයිශ්වර්යා දුන්නා වගේ 😀

    Reply
    • සුසර

       /  September 10, 2012

      අර ගුරුතුමා තව ගොඩක් දේ ඉගැන්නුවා තමයි
      AL විද්‍යා පන්ති වල ඉංග්‍රීසි උගන්වන්න තිබුණු සීමිත කාලයේ ඔහු පාසලෙන් පරිබාහිර එහෙත් නව යව්වනයන්ට වැදගත් බොහෝ කාරණා කතා කලා

      Reply
  4. DDT

     /  September 10, 2012

    ම් …… මේ වගේ කතාවක් ලියපු එකේ අරමුණ මොකක්ද? මට නම් ඒක විශ්වාස කරන්න බෑ.

    Reply
  5. ප්ලැටොනික වීතරාගී ආදරයක්………..9,10 විතර පංති වල හිටිය කාලේ මතක් වුනා……

    Reply
  6. Anonymous

     /  September 10, 2012

    We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane. We want Shane.

    Reply
  7. ප්ලැටොනික වීතරාගී ආදරය…මම නම් මේකට කැමතියි. 🙂

    Reply
  8. Charith M

     /  September 10, 2012

    ප්ලැටොනික වීතරාගී ආදරය…

    Reply
  9. හරි අපි මැරෙන්න හැදුවට මහජන මුදල් නාස්ති කරලා පුතාලගේ ආසාව පිනවන්න ඉන්දියන් නිලියෝ ගෙන්නුවා කියලා ඒක කොයි තරම් සාධාරන රොමෑන්ටික් සිදුවීමක්ද ඒ වෙනුවෙන් ලබන අවුරුද්දේ ඒ වගේ විසිගුණයක මහජන මුදල් නාස්තියක් කලත් කමක් නෑ කියලා හිතෙන තරම් ඒ සිදුවීම සාධාරණීයකරණයක් මේ ලිපියන් වෙලා තියෙනවා . .

    ඉතිං මදිද?

    Reply
  10. “පුංචි තිරයේ නටන මේ අපූරු යුවතියට මම එකෙණෙහිම වශී වූයෙමි. ඇගේ, ඇස්, නැහැය, සිහින් සිරුර, ආඩම්බරකාර පෙනුම මා උදෙසාම දෙවියන් විසින් මවන ලද්දාක් වැන්න. මට හැඟුණේ ඇය මා ජීවිතකාලය පුරාවට දත් කෙනකු සේය. මගේ මොළයෙහි නියුරෝන සියල්ල එකවර පණ ආවාක් සේ විදිලි සර නිකුත් කරන්ට පටන් ගත්තේය.”

    විස්වාස කරනවද . . මම කොල්ලා කාලේ මටත් මේ දේම උනා . . හැබැයි ඒ තේසාබ් ෆිල්ම් එක නිසා. ටියුශන් ෆීස් ගෙවල්ල දුන්නු සල්ලි වලින් දෙතුන් පාරක් ම තේසාබ් බැලුවා (ඒ නිසා මාසෙක ටියුශන් කට් වීම ගැන ටිකක් වත් දුක හිතුනේ නෑ)

    මුල් ටික කියවද්දී මට නම් හොඳටම හිනා ගියා. ලේඛකයටත් මට වෙච්චි දේම ඒ විදිහටම වෙලා තියෙන එක මාර කොයින්සයිඩ් වීමක් කියලා මට හිතුනා . .

    Reply
  11. ranwala

     /  September 10, 2012

    ප්‍රේමය නම් රාගයෙන් තොර සඳ එලිය සේ අචින්ත්‍යයි.මේක හරියට ආදරයේ වර්ගීකරණ පාඩමක් වගේ.චරියගේ ලව…ශේන්ගේ ලව…වික්ටර්ගේ ලව….දැන් තිසරගේ ලව…

    Reply
  12. Anonymous

     /  September 11, 2012

    LOL your fanboy-ing is cute. So is it correct to say Madhuri is your diva?

    Reply
  13. ප්ලැටොනික වීතරාගී ආදරය කියන්නේ හරියටම මොකද්ද..? 😦

    Reply
  14. Question – 2003 – Facebook Fan Page?
    Answer – The Parallel Universe

    ඉතා ප්‍රායෝගික විවරණයක්. බහුතරයකට ඔවැනි අතීතයක් තිබූ බව නොකිවමනාය.

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: